അത്തോളി റോഡിന്റെ ശോചനീയാവസ്ഥ: പൊതുമരാമത്ത് മന്ത്രി ഇടപെടണം -യൂത്ത് കോണ്‍ഗ്രസ്

അത്തോളി :  ഉള്ളിയേരി മുതല്‍ അത്തോളി വരെയുള്ള പ്രദേശത്തെറോഡിന്റെ ശോചനീയാവസ്ഥ പരിഹരിക്കാന്‍ പൊതുമരാമത്ത് വകുപ്പ് മന്ത്രി നടപടി സ്വീകരിക്കണമെന്ന് യൂത്ത് കോണ്‍ഗ്രസ് സംസ്ഥാന ജനറല്‍ സെക്രട്ടറി വി.പി ദുല്‍ഖിഫില്‍ ആവശ്യപ്പെട്ടു. ജില്ലയിലെ കുറ്റ്യാടി കോഴിക്കോട് ബസ് റൂട്ടില്‍ കഴിഞ്ഞ നാല് ദിവസമായി സമരം നടക്കുകയാണ്. ഈ സമരത്തിന്റെ പ്രധാനപ്പെട്ട കാരണം ഉള്ളിയേരി മുതല്‍ അത്തോളി വരെയുള്ള പ്രദേശത്ത് റോഡിന്റെ ശോചനീയാവസ്ഥയാണ്.. കഴിഞ്ഞ ആറുമാസമായി ഈ ശോചനീയാവസ്ഥ നിലനില്‍ക്കുകയാണ് അധികാരികളുടെ ഭാഗത്തുനിന്ന് യാതൊരു നടപടിയും സ്വീകരിച്ചതായി കാണുന്നില്ല. കഴിഞ്ഞ നാല് മാസങ്ങള്‍ക്ക് മുമ്പ് കുഴിയില്‍ വീണ് തെറിച്ച് മനുഷ്യന്റെ ജീവന്‍ പോലും നഷ്ടപ്പെടുന്ന അതി ഗുരുതരമായ സാഹചര്യം ഈ റൂട്ടില്‍ ഉണ്ടായിട്ടുണ്ട്. ബസ് സര്‍വീസ് നടത്തുമ്പോള്‍ റോഡിലെ കുഴികളില്‍ നിറഞ്ഞ ചളിവെള്ളം പ്രദേശവാസികളുടെ ദേഹത്ത് തെറിക്കുകയും അതുമായി ബന്ധപ്പെട്ട സംഘര്‍ഷങ്ങളുമാണ് ജനങ്ങളെ അങ്ങേയറ്റം ബുദ്ധിമുട്ടിക്കുന്ന തരത്തിലുള്ള സമരത്തിലേക്ക് നീങ്ങിയിരിക്കുന്നത്. നൂറുകണക്കിന് വിദ്യാര്‍ത്ഥികളുള്‍പ്പടെ യാത്ര ചെയ്യുന്ന ഈ റോഡിന്റെ ശോചനീയാവസ്ഥ എത്രയും പെട്ടെന്ന് പരിഹരിച്ചില്ലെങ്കില്‍ അതി ഗുരുതരമായ അപകടങ്ങളും മറ്റു പ്രയാസങ്ങളും ഉണ്ടാകുമെന്ന കാര്യം ഉറപ്പാണ്. ഉടന്‍ നടപടി സ്വീകരിക്കണമെന്നും ആവശ്യപ്പെട്ടു.